| 汽車主旨 ﹝請按主旨作出回應﹞ 下頁 尾頁 | 寄件者 | 傳送日期
|
| [#1] 搶救Integra 話說最近知道有同事想賣走佢架1995年嘅Acura Integra(美版四眼仔) LS自動波，就約咗時間上佢屋企睇車。 講講架車先，白色有天窗(我鐘意，可以利用負壓抽走熱氣)，揸咗接近28萬7千咪(287k mi)。車頭冇大撞痕跡，頭冚冇拆過，但fender同頭冚嘅間隙唔平均，似乎有小撞同整過，司機位fender 有翻噴痕跡。司機邊後門有擦傷同少凹，行李箱有漏水現象。但佢話以前揸果陣個波箱有洗嘅情況，依家已經PNO(Planned of Non-Operated)咗年幾。 由於好耐冇揸過，電池都瓜咗(後來用他錶他過，得2.幾V)。就用過江龍搭著，聽落架車都算精神，唯獨盤頭有啲聲(engine油唔夠), 睇埋水溫錶，嚇親！已經指到3/4位置，摸摸底水喉仲係凍嘅！結論：水溫錶或者水溫傳感器壞咗。掹走傳感器條線，水溫錶指針回落到最凍位。可以肯定水溫傳感器柴咗。 既然著咗車，自然要睇埋水油，踩實煞掣，所有波段入一次，放返入P﹐熄車(Honda自動波箱要熄車睇油量)。抽油呎，呵呵，完全掂唔到油。 (To be continued) |
ckwan2014 正式會員69.xxx.xxx.52 |
2019-07-17 21:00 | |
|
|
|||
| [#2] 搶救Integra 睇到呢度，我對架車大概有了解，就同同事講，“我最多用1000蚊(美金)同妳買咗佢。” 我畀呢個價係因為一來架車年事已高，接近30萬咪，如果SMOG驗車唔過，辦退休(劏)都係畀返1000你。二來車主話波箱有洗，而我到呢度都未試揸過架車(想揸，但一入波行就死火，之後再講返)。而令佢想賣車最重要嘅原因，係backyard嘅一個房仔，佢想搞裝修，整埋個廁所出嚟再租俾人。老實講，如果佢肯賣，我會即刻畀錢，因為我知道裝修處處都係錢。但當時車主就話諗吓先，咁我就返屋企。 隔咗幾日，佢發個SMS俾我“如果我500蚊賣架車俾你，你要唔要？”“妳講真嘎？！”我唔明白點解會自己㩒低個價，佢咁等錢使？ |
ckwan2014 正式會員 69.xxx.xxx.52 |
2019-07-17 21:21 |
| [#3] 搶救Integra 放break果陣，我問真佢，確定佢冇講錯，真係500﹐就一口應承咗。佢仲問我“你有冇現金？”我話“車我去美銀㩒機囉”。 於是果日收工，佢就車埋我，先去銀行㩒機攞錢，再返佢屋企。今次我帶埋10mm扑頭，諗住搞好個電池頭，咁就可以揸架車返屋企，順便當試車。原來個負極電池頭鬆鬆哋，點收螺帽都擰唔實。試咗幾次都唔得，我就用條類似乾柳葉咁嘅嘢，攝喺電池頭度，終於夠實，入波轉波都chok唔甩。 告別同事，我一路喺街揸，搵路上翻freeway返屋企。期間發覺大腳油會容易洗，於是就住架車嚟揸，掂住油門咁慢慢印落去。之後又覺得，轉緊彎開油，100%會洗波箱，就更加肯定我嘅猜測：波箱缺油引致洗。內心已經盤算緊一系列嘅維修計劃。離開同事屋企越嚟越遠，心中嘅喜悅就越嚟越大！ |
ckwan2014 正式會員 69.xxx.xxx.52 |
2019-07-17 21:45 |
| [#4] 搶救Integra 樓主，呢款？ 我期待收看你既整車大計！  |
Rosenbloom 正式會員 119.xxx.xxx.137 |
2019-07-17 21:54 |
| [#5] 搶救Integra R大，茅錯係佢！不過我架係4門sedan 最後修改時間: 2019-07-17 22:13:13 |
ckwan2014 正式會員 69.xxx.xxx.52 |
2019-07-17 22:12 |
| [#6] 搶救Integra 貼過 四門款 :-)  |
Rosenbloom 正式會員 119.xxx.xxx.137 |
2019-07-17 22:28 |
| [#7] 搶救Integra Go go go, looking forward to your updates |
我是一個人 正式會員 219.xxx.xxx.185 |
2019-07-17 22:29 |
| [#8] 搶救Integra 樓主最後是奶嘢定？筍嘢？ 我都希望可以豆腐渣載價錢收一部大牛Diablo or Murceilago 返嚟攪吓。 |
Mehk1 會員 203.xxx.xxx.237 |
2019-07-17 23:05 |
| [#9] 搶救Integra 10分鐘嘅街坊路，10分鐘嘅freeway, 終於平安返到屋企。落車即時摸摸底水喉，係同頂水喉一樣咁熱嘅，證明水膽(Thermostat)同散熱器係正常工作，隨即放下一塊心頭石。不過一熄車再想撻車，已經撻唔着嘞。而且我未親眼見到散熱風扇著，個心都係戚住戚住。 入屋攞他錶同jumpstarter，督一督電池，測得2.xV﹐電池柴得。跟手搭好jumpstarter, 着車，再督電池，14.6V﹐打南磨(alternator)冇事。好嘢！ 熄車入屋，上網訂咗3支V字頭5qts裝嘅10W30偈油同佢牌子旗下嘅MaxLife ATF 1Gal。跟手打俾做車房老闆嘅表弟，訂咗水溫傳感器，確定佢鋪頭有我要嘅電池型號(雖然Integra用嘅係大路型號，civic甚至部分accord都用佢，不過都係穩陣啲，問定先好)。就著好裝備，揸老電去佢鋪頭攞貨。 |
ckwan2014 正式會員 69.xxx.xxx.52 |
2019-07-17 23:15 |
| [#10] 搶救Integra 由於我泊車嘅地方算係半山，所以路面都會有幾大落差，而水溫傳感器所在個位置，比起水箱入水口要低唔少，所以就打算等車後面一段落斜有位吉出，就泊過去，等攤凍(我反正唔趕，預等一日)再換水溫傳感器。如是者，換好電池，泊好靚位，一切似乎好順利！(換水溫傳感器太簡單，12mm長socket加扑頭搞掂，恕不贅述) 國慶(我係國慶(7月4號)同佢辦手續買車)之後果個星期一，我夜班收工，就趕過去附近嘅DMV打算辦轉名，原本我以為佢最近做咗驗車，亦冇詳細睇佢份驗車紙，點知DMV個員工同我講，"先生你要去做翻SMOG喎，你俾我睇呢份係2017年嘎。依家手續辦好嘎啦，多謝161蚊吖！” 我都聽過呢幾年牌費貴咗，不過$161都尚算可以接受。但驗車對於舊車嚟講就可圈可點啦。因為任何事都可以發生，可能副偈行得唔好，又可能催化柴哂，通哂窿…… 點都好，我要去做翻SMOG﹐整個轉名手續先至真正完成，而且，我仲未買車保險。樣樣都係錢呢！ |
ckwan2014 正式會員 69.xxx.xxx.52 |
2019-07-17 23:45 |
| [#11] 搶救Integra 由於我要搞SMOG﹐咁就要郁車，而冇保險再加新登記牌費，喺Freeway好容易被好人逗，所以我決定買咗保險先揸去驗。 阿媽住果邊隔離就有間做驗車，所以，我網上加咗架車落保險，就揸返去阿媽度。呢個SMOG可以話既預咗，又估佢唔到。預咗，係預咗會肥(原因上文講咗); 估佢唔到嘅，係佢肥我嘅兩點。 肥之一：點火正時較得太早，去到20° BTDC。準確位置係16° BTDC(+-2°) 肥之二：催化換過，但唔係加州核准嘅型號。 肥點火我認，因為都冇睇過，但屬於易搞。去Harbor Freight Tools買支Timing Light(用Xenon燈膽)﹐較翻正就撈麵。但我諗唔明點解會換過嘅催化都會有問題(事後睇返2017年果份驗車紙，寫住加州核准型號，但見唔到冧巴。咁樣我就明哂，下詳) |
ckwan2014 正式會員 69.xxx.xxx.52 |
2019-07-18 00:12 |
| [#12] 搶救Integra 又一日，收工返屋企等到HFT開門，就揸過去買咗支timing light, 返到屋企有瓦遮頭，就攞齊12mm socket同梅花，著車開頭冚，timing light正負極駁電池，訊號線扣住1號盤火咀線，就挽雞射落crank pulley度。 講講個crank pulley, 當我哋面向隻crank pulley 嘅時候，會見到pulley邊有四個點，一個白色，一個紅色，另外兩個凹咗嘅點，冇上色，一左一右分佈喺紅色點兩邊。白點係0° BTDC(Before Top Dead Center, 上止點之前)。紅點係16° BTDC﹐兩個凹點，就係對應嘅+-2°。以前嘅車，由於冇咁多電腦嘢，所以會用分火盤去處理唔同盤嘅點火時間，分火盤內，定子駁火咀線，轉子駁coil,.而帶動轉子旋轉就係通過一凹一凸嘅一對轉軸，一邊喺分火盤，另一邊駁住camshaft, 咁樣就成就咗一套分火系統。 調較正時喺呢套系統亦十分方便，只需要鬆開分火盤底座螺絲，然後按需要順或逆時針輕微轉動分火盤，同時觀察正時點同正時皮帶蓋上嘅記號係咪吻合就得。因為分火盤底座頂比較高，socket唔啱入，所以就用到梅花去鬆最頂果口螺絲。 如此這般較好哂正時，就揸去muffler shop, 要換催化嘞。去到同師傅仔打好招呼，話一個鐘會送到貨嚟，咁我就返阿媽度食個晏先，再返去換。(一個鐘之後)揸到入鋪頭，見個老師傅，仲係唐人嚟添。同聲同氣，咁就方便得多啦。原來老師傅80年代已經嚟美國，一上埠就做muffler shop。師傅仔係佢個仔，美國出世嘅。 話都冇咁快，燒好焊嘞。畀錢收receipt, 褪車出馬路果陣，師傅仔重提我：“左邊倒車燈燒咗。”“唔該你！”跟手返去SMOG station翻驗(閹？), 自然係順利非常(雖然都係用翻咁上下時間), 高分過關。 |
ckwan2014 正式會員 69.xxx.xxx.52 |
2019-07-18 02:49 |
| [#13] 搶救Integra 話分兩頭，講返我屋企。呢個係一間依山而建，兩層嘅獨立屋，向街嘅一層係廳同廚房，廳俾屋主改為主人房，另外3個房仔喺後邊。負一層本來得一間房(我住)，有個幾大嘅entertainment room﹐俾屋主改多兩間房出嚟，另外一個鍋爐房又係改埋張床出嚟，又多一間。 廚房出嚟就係前廳，幾級樓梯行過隔離就係有頂嘅2車泊位，計埋driveway, 總共可以泊4架車。但即使係咁樣，前段時間泊位經常滿車。亦係咁，令我買料嘅同時，買埋幾樣必備物品。 物品一：修車斜坡。 呢對長達22"嘅斜坡，係用沖壓塑膠制成，盡頭有平臺同凸起(防止揸過龍)﹐受力位有到地嘅分支同圓筒，好穩陣。佢嘅好處就係唔使花時間同工夫去積高架車，就係1分鐘同十分鐘嘅分別。雖然凳仔同地積我都有買(用途下詳)，但主要係換油的話，擺好斜坡，揸上去就換得。方便好多。 物品二：凳仔(jackstand)。 買佢嘅原因，一部分係當時未知個波箱咩事，諗住有機會換波箱都用得著。當收車之後，發現波箱問題唔大，但頭避震有啲怪聲(雙搖臂), 而且頭尾個離地好唔同，份頭沓咗吋幾兩吋。所以，第時要積高頭轆望望咩問題。 物品三：地積(floor jack)。原因同物品二。 物品四：23A電池。Keyless Entry要用。又係同車電池一樣，全新12V嘅電池，剩返2V幾…… |
ckwan2014 正式會員 69.xxx.xxx.52 |
2019-07-18 03:52 |
| [#14] 搶救Integra ching堅！ |
skyliner 正式會員 219.xxx.xxx.182 |
2019-07-18 06:15 |
| [#15] 搶救Integra Good post! 果個年代嘅 Honda, 避震懸掛好易打柴。 |
dlbf 正式會員 103.xxx.xxx.242 |
2019-07-18 11:09 |
| [#16] 搶救Integra 真係勁！ Pls upload more photos for us to see. |
Megeorge 正式會員 14.xxx.xxx.169 |
2019-07-18 11:34 |
| [#17] 搶救Integra 好堅 |
STSl 正式會員 221.xxx.xxx.204 |
2019-07-18 12:09 |
| [#18] 搶救Integra 師兄 好堅，又羨慕有 空間自己攪大玩具。 總之要 安全至上 |
EF9 正式會員 221.xxx.xxx.14 |
2019-07-18 12:57 |
| [#19] 搶救Integra 樓主佳美國定加拿大？ 香港就算是住康樂園，一般都冇咁多位去攪。 |
Mehk1 會員 203.xxx.xxx.237 |
2019-07-18 14:10 |
| [#20] 搶救Integra #19.樓主佳美國定加拿大？ 香港就算是住康樂園，一般都冇咁多位去攪。 》》》文中所説是美國加州。 |
CS168 正式會員 119.xxx.xxx.238 |
2019-07-18 16:24 |
