兩聲道
CD機 | MD機 | SACD機 | DAC | CAS | 合拼擴音機 | 前級擴音機 | 後級擴音機 | 接線 | 喇叭線 | 揚聲器 | 耳機 | 耳機擴音機 | LP產品 | 膽機產品 | 開卷式錄音機 | 音響配件 | DIY音響 | 電源 | 家庭影院
電視機 | 投影機 | 錄影機 | DVD影碟機 | Blu-ray影碟機 | 多媒體播放器 | 機頂盒 | 多聲道擴音機 | 多聲道揚聲器 | 多聲道影音組合 | Mini音響組合 | 重低音揚聲器 | 輔助設備 | 同好會
同好會 | Accuphase | B&W | Burmester | Denon | Jadis | KEF | KRELL | Luxman | Marantz | Nuforce | OPPO | Pioneer | TEAC | WEISS | News
News | Blog | 其他
其他 | 所有 |
| 影音天地主旨 ﹝請按主旨作出回應﹞ 下頁 尾頁 | 寄件者 | 傳送日期
|
| [#1] AV擴音機維修 忍唔住要分享一吓最近維修AV擴音機嘅不快經驗。 事緣我部陳年先鋒L82有一條聲道突然冇咗聲，諗住拎返去原廠維修，品質應該好啲，貴啲都冇所謂，於是就托部機上去先鋒喺長沙灣嘅特約維修中心。 上到去先發現，原來安橋、馬蘭士、天龍都係佢哋做維修，信心立時再大增。 但嗰度地方淺窄，望入面好似得一個維修師傅。 大部份空間擺滿舊機，一部搭一部搭到高過人。 一行行機柱，砌成一幅幅機牆。 話晒日本高級品牌，仲要係4大，但維修中心咁嘅格局都幾慳皮。 盛惠檢查費$450，佢話1星期內會報價同攞得。 1星期過去冇人通知，我打電話去問，佢話有好多機整未得閒，叫我1個星期後再問。 到期再打去又話AV機好複雜，唔係咁容易查到問題，我唯有繼續跟進。 後來有一次話查到係底板壞要換底板，已訂緊返嚟，實際幾多錢未知，但應該千零蚊ok。 佢又好幫手咁話如果底板返唔切，佢會叫師傅用其他方法幫我整好，叫我一星期後再打去。 到期我再打去有另一人聽，又話師傅未check到邊度壞，叫我再等一星期。 到期我再打去又話係底板壞，要訂底板成塊換，推翻之前嘅講法，話冇可能好似出面舖頭咁淨係幫我換部份零件。 佢問我訂唔訂？ 我心諗，乜唔係早2個星期前已經知道係底板壞，嗰時已幫我訂緊，點解？家都仲未訂？ 我忍住條氣問佢，底板幾多錢？ 佢答$3,500。 我之前查過一部咁嘅二手機市價最多一千。 貴都算嘞，我再問佢幾時訂到底板返，佢嘅答案係未知幾時，冇確實時間！ 我即時畀佢谷爆，於是話唔整嘞！ 如是者我部機擺咗喺佢哋嗰度一個半月，最終要原封不動拎返屋企！ 事實佢哋有冇打開過機殼睇過都唔知，可能只係口頭話幫你整，其實就咁放喺度，等一段時間你知難而退自己托返走，佢就無本生利$450！ 但事實都冇得怪佢哋，一開始都知道咁舊嘅機係未必整得到。 件事都仲未完。 我死唔忿氣，上網搵其他地方整。 當我正想拎去試試時，有位職業音響專家同我講，出面肯定冇地方會整得到，因為中美貿易戰同疫情，國內工廠買唔到零件生產底板，叫我死咗條心，慳返$200檢查費。 我諗咗幾日，最後都係決定唔聽專家建議，即管晒多2舊。 於是又再托部機去，然後電話來來回回3個星期，但感覺佢哋係有心盡力嘗試去整。 起碼會主動打電話回覆跟進情況，唔會好似嗰間4大品牌特約維修中心一樣，應承咗回覆都冇影，幾乎次次要我再打去問。 間舖頭話幫我試咗換幾個零件都唔得，結果等另一份零件到終於整好，話差唔多換咗半份底板。 連之前已付$200檢查費，總共$1,100搞掂！ 去拎返部機時個店員好友善解釋，又即場示範逐個聲道出聲冇問題。 叫我返屋企慢慢試，有問題隨時拎返去。 最後仲用幾層膠紙將部機包好，話咁樣好拎啲，唔會線手！ 上次嗰間特約維修中心真係采你都有味！ 部機事後我喺屋企試咗幾星期，確係整好咗！ 一間街邊舖頭用咗3星期就將部陳年舊機整好，而所謂原廠特許維修中心，晒咗我5個星期結果係乜都搞唔到，服務又差！ 如果佢哋令人感覺到佢哋有盡力去做而結果整唔到，咁冇人會怪佢，但成件事令人覺得佢哋根本喺度hea做！ 想問吓呢間特許維修中心，做嘢做到你哋咁樣，究竟知唔知個醜字點寫？ 如果冇心整一開始就唔好收嚟整，你哋打開門口係咪就係志在呃嗰幾百蚊檢查費？ 你哋阿媽有冇教你哋做人要有基本道德，你哋做生意有冇基本商業道德？ 如果冇能力整就執Q咗佢咪出嚟獻世！ 事後上網睇，原來呢間垃圾早已被網民唾駕，但到？家都仲係死性不改，可想而知佢哋係一派你吹得我漲嘅態度！ 4大日本品牌喺香港搵間咁嘅垃圾做特許維修，究竟係啲㗎仔？家墮落到咁，定係啲㗎仔易呃到咁呢？ |
jtpc 正式會員112.xxx.xxx.173 |
2020-12-08 23:10 | |
|
|
|||
| [#2] AV擴音機維修 ＞＞#1...一部搭一部搭到高過人。 一行行機柱.... ------------------------------------------------------------------------ 開門, 第一眼 見到 機叠機 高過人, 已經打個凸..... 最底個幾部"責"完都玩完. |
cornercube 正式會員 119.xxx.xxx.111 |
2020-12-09 07:43 |
| [#3] AV擴音機維修 原廠維修係咁上下啦,佢根本就係想你換機,維修部只係應酬形式.等同埋貴就一定,唯一好處係唔會用僵屍零件. |
Philippe 正式會員 202.xxx.xxx.209 |
2020-12-09 08:32 |
| [#4] AV擴音機維修 反而想知最後整返好部機間街邊舖頭，表揚一下佢地。  |
老玩童 正式會員 27.xxx.xxx.254 |
2020-12-09 09:05 |
| [#5] AV擴音機維修 一般黎講間野又唔請人幫手,電子佬只識維修唔識管人... 又怕比人學到技術.. 結果只有佢一雙手賺錢,又慢又賺少左錢... 而且電子技術好既人最少都50歲,比萬零蚊加上維修環境差,work load 大,有人做先奇.. |
olivea88 正式會員 61.xxx.xxx.187 |
2020-12-09 09:38 |
| [#6] AV擴音機維修 #4 x 2 樓主可否公開 此小店丶現時好多師兄都有 avm 但又易壞！ |
phil.ng 正式會員 223.xxx.xxx.187 |
2020-12-09 09:59 |
| [#7] AV擴音機維修 #4 x 3 樓主可否公開 or pm 此小店, thank you. |
Ah_B_B 正式會員 113.xxx.xxx.242 |
2020-12-09 12:03 |
| [#8] AV擴音機維修 av amp格式日新月異，線路又比2ch複雜，行MPU而且零件又唔易買到，有時就軟件壞，街師傅邊肯用時間去攪，攪完可能得個桔。除非搵二手佬手頭又有部機，拆板試報個價夠買架二手機有餘或者就做。 最後修改時間: 2020-12-09 12:46:59 |
kx14cp1 正式會員 45.xxx.xxx.96 |
2020-12-09 12:46 |
| [#9] AV擴音機維修 大家實在想得太美好了，所謂四大品牌特約維修中心，其實只係外判商，而依D外判(其實應該話所有外判商)都唔係為用家解決問題的，佢哋並不是直屬日本四大品牌，只係同本地代理簽約負責維修，係遂單計，正如樓主所講，hea你一輪之後食咗你check机費，之後其實咩都無做就報个天價比你，知你實唔整攞番走，咁佢就乜都唔使做，日日靠收check机費過日神，你可以去代理度投訴佢，咁代理可能会換過第二个外判商，但做嘢方式基本不变，靠呃渡日，講到依度大家明白外判制度的敝病味？外判商跟本不会解決用家的問題，佢哋只会上呃外判顧主，下呃用家，中間就剝削工人，好多甚至只係one man band,就係咁嘅原因，而外判工作的顧主一心只為減省成本，對用家服務跟本懒理，我講緊其實唔單止係hifi維修，而係所有外判工種，佢哋唔会考慮服務差会影響品牌嘅聲譽，因為跟本係兩間公司嚟 最後修改時間: 2020-12-09 14:26:14 |
chhnpng 會員 42.xxx.xxx.154 |
2020-12-09 14:21 |
| [#10] AV擴音機維修 其實好多歐美真正大企業已明白外判的敝病，只有果D為富不仁嘅商家佬至会死抱外判制度不放，咁樣佢哋就可以賺盡每一分每一毫，最不堪嘅係有D政府為求推缷責任，盲目跟隨，大家有留意堅尼系數和外判制度的關係嗎？係幾時开始有在職貧窮出現㗎？ 最後修改時間: 2020-12-09 14:48:33 |
chhnpng 會員 42.xxx.xxx.154 |
2020-12-09 14:47 |
| [#11] AV擴音機維修 我絕對明白原廠唔想客人整機，換過部新嘅就最好，所以佢哋大可以直接話唔整。 我呢部先鋒LX82起碼有15年歷史，原廠唔肯整都好正常。 但既然佢哋要接嚟整，收咗幾佰蚊檢查費，就有責任盡力去整好，呢啲係基本生意道德。 而唔係好似佢哋咁樣接咗，分分鍾鍾就咁擺埋一邊，畀客人追得急先求其答要成份底板換。 成份底板換都冇所謂，貴都ok。 但佢哋係專業維修，部機有乜問題佢哋應該好快大約估到邊度壞。 如果佢收機後一兩個星期話畀我聽底板壞，要訂有排等，我都冇咁嬲。 但佢哋搞我5個星期先話我聽底板壞，唔知幾時有貨，係咪玩呢？ 求其hea做呃嗰幾佰蚊檢查費？ 當然唔係原廠整，其他人可能係拆舊機零件。 但對於一部15年歷史嘅AV擴音機，原廠都唔一定仲有全新零件。 好似我單case，要我等都冇所謂，但起碼要話我聽一個確實限期而唔係無了期。 我搵外面整，起碼我部機現已整好冇問題。 幫我整好嘅舖頭自己有賣水貨，我之前聽佢哋話零件係第度寄返嚟。 |
jtpc 正式會員 45.xxx.xxx.66 |
2020-12-09 16:22 |
| [#12] AV擴音機維修 幫我整好嘅舖頭，我都係喺網上討論區見有師兄推介。 其實我都好想開名表揚吓好店，但又怕人以為我作古仔做打手，抹黑原廠特許維修店。 用返之前我喺網上討論區見到師兄推介叫佢哋深水埗成記，好似賣咗水貨多年，維修應該係副業。 我相信各位師兄已估到佢哋全名。 |
jtpc 正式會員 45.xxx.xxx.66 |
2020-12-09 16:24 |
| [#13] AV擴音機維修 佢哋有做二手買賣，應該都係百鳥歸巢多…… |
chhnpng 會員 14.xxx.xxx.89 |
2020-12-09 19:30 |
| [#14] AV擴音機維修 維修AV機梗係在其他同款壞機找到合用來修理啦！有乜話百鳥歸巢？你唔係覺得可以買到裡面專用ic呀？ |
Edo 正式會員 59.xxx.xxx.254 |
2020-12-09 19:43 |
| [#15] AV擴音機維修 外判維修代理,我相信係有整機既,不過正如 one man band,手又一對, 人又中年或者半老人.. 精力又不前,加上成日比人追機維修好未,或者機又難整, 枱又多雜物又挃攤開左成三部機拆開未整好.. 試問你有新機加入,佢又邊有心機執好位又睇你部機呀... 你打般追咪一拖拖得耐就話報價好貴, 希望你棄修... 有時搵網上師傅同街鋪分分鐘仲有機會整好.. |
olivea88 正式會員 61.xxx.xxx.187 |
2020-12-09 21:52 |
| [#16] AV擴音機維修 咁舊嘅機，原廠冇得整或整唔掂，出面有人肯整，又咁叻整得返好都偷笑，都冇得計較佢係百鳥歸巢，定用乜野零件。最令我滿意嘅係嗰間舖頭嘅工作態度，有heart同熱誠，收咗錢就盡力幫你砌掂。AV機又複雜但價格低，花咁多工夫，先收嗰1千幾百，收得貴都冇人肯畀錢整。可見佢地老細喺整機上應該都冇乜錢執，純粹養住班師傅，整好部機又幫到人都有滿足感。 最後修改時間: 2020-12-09 23:54:51 |
jtpc 正式會員 45.xxx.xxx.222 |
2020-12-09 23:54 |
| [#17] AV擴音機維修 代理，街店 跟本係二樣野，唔講話千零蚊二手av, 朋友10年 honda 一路返開代理整，有時零件都係要等幾個月，但街店隨時有貨又平D喎。點解，因代理主力招呼新車有保用期既客，資源都唔同零件都齊D，10年車過哂保用期，車價低，你行入來，.代理都會照接，收費唔會平D，因代理嘛，點會唔接？但運作就好唔同 ,有時去幫襯也要瞭解下先好D，話 呃檢查費與否，就唔知嘞，行騙係犯法的 最後修改時間: 2020-12-10 08:39:47 |
RFC 正式會員 14.xxx.xxx.133 |
2020-12-10 08:31 |
| [#18] AV擴音機維修 整車唔同，個客肯等幾個月，斷估佢唔等車用，或者佢太鐘意架車。但普通電器，正常人會唔會屋企有幾部，或者鐘意部機到願意無了期唔用等零件？我之前有部Canon攝錄機攞去維修，代理就同我講部機太舊冇得整，咁我咪買部新囉。所以唔係有客拎個去，代理就一定要接。我前面都講過，要等同稍貴都冇問題，問題係佢地搞咗5個星期，中間又反來覆去，冇心跟進，最後仲要講唔知要等幾耐！係咪根本太多機整唔切，所以求其揾個藉口等你自己放棄拎走，佢就袋袋平安？洗唔洗驗5個星期先？一部機真係要驗5個星期佢真係要蝕大本嘞！如果太多機整所以要等咁耐，咁佢一開始唔知嘅咩，做乜話我聽一兩個星期得呢？就算係政府部門，都會列明市民申請手續要幾耐，呢啲叫服務承諾。一間商業機構，我攞去時同我講話正常一兩星期搞掂，結果係無了期。偏偏其他人3星期就搞掂，特許維修中心喎，真係得啖笑！各位師兄有興趣可以喺其他討論區搵吓其他人對呢間特許維修中心嘅投訴，係連保用期中嘅客人都要鬧佢地嘅態度丶收費同維修嘅時間！ 最後修改時間: 2020-12-10 09:57:27 |
jtpc 正式會員 45.xxx.xxx.60 |
2020-12-10 09:44 |
| [#19] AV擴音機維修 去消委會，係喎，佢有冇計你倉租？ 最後修改時間: 2020-12-10 10:49:10 |
RFC 正式會員 14.xxx.xxx.133 |
2020-12-10 10:45 |
| [#20] AV擴音機維修 至於話佢地呃檢查費，就等如話人呃飯食，意思就係收咗錢但冇做到應做嘅野。咁呃飯食係咪犯刑事？有冇做野，佢自己心知肚明。佢地日常收咁多機，係咪真係唔知有幾大機會整到？有商業道德嘅，明知整好機會低，索性拒絕唔做，費時畀人鬧，而唔係來者不拒，鬼叫你自願上釣。如果要做，就唔應該拖咁耐，盡快話畀人聽整唔到，浪費客人時間先係大問題。 |
jtpc 正式會員 45.xxx.xxx.60 |
2020-12-10 11:09 |
